Të moshuarit në juglindje socializohen në qendrat ditore, merren edhe me punë

Mbi 800 të moshuar frekuentojnë çdo ditë qendrat ditore në Korçë, Maliq, Pogradec, Devoll e Kolonjë, të cilët merren me aktivitete të ndryshme sociale.

Një pjesë e mirë e kësaj kategorie shoqërore merren me punë të ndryshme, kryesisht ato artizanale siç ka të tjerë që kanë pasion pikturën dhe punët me grep.

Dy të moshuara shprehen se shumicën e kohës e kalojn me punë shtëpie dhe punëdore.

“Merrem me punëdore, me pëlqen qendisja, grepi. Kam bërë guverta, Centro, tavolina me grep e kam argëtim, çlodhje, relaks“, shprehet Veronika Zguro.

“Ditën e kaloj me shëtitjen në mëngjes, pastaj me punët e shtëpisë e ne fund bëj ndonjë pikturë në këtë moshë. Pimë kafe, bëjmë muhabet me miqtë që vijnë, pikturat nuk i shes, ia jap shoqeve”, tha Ana Kapedani.

Rrapo Ahmetaj thotë se duhet të ketë më tepër kujdes për të moshuarit që jetojnë të vetmuar në banesat e tyre.

“Ndoshta organet kompetente që merren me këtë problem duhet të përmirësojnë punën e tyre ku të moshuarit e vetmuar që gjejnë vdekjen e i gjejnë pas disa kohësh duhet të punojnë me shume. Është e domosdoshme qe shërbimi social të shkojë tek këta njerëz qe është për të ardhur keq që fëmijët ikin pas e nuk i kthejnë sytë pas për ata që i lindën e i rriten”, tha i moshuar, Ahmetaj.

Këshilli i Qarkut po tenton të finalizojë një projekt që do të shërbejë për të moshuarit e vetmuar, ku nëpermjet një salle operative mund të dërgojnë sinjalet në rast nevoje.

“Të moshuarit që frekuentojnë qëndrat ditore punimet e tyre ekspozohen dhe bëhet një ankand me këto punime e këto të ardhura kalojnë për mirëfunksionimin e qendrave. Presim që nëpërmjet projekteve të BE të kemi një projekt në lidhje me ata persona të vetmuar me sinjalizimin e familjarëve në momentin që kanë problematika sinjalizojnë në një sallë operative”, theksoi Petrika Tollkuci – Kryetar i Këshillit të Qarkut

Kanë qenë të shumta rastet kur të moshuar të vetmuar kanë humbur jetën në banesat e tyre në Korçë dhe kanë qenë fqinjët ata që kanë njoftuar organet policore për vdekjen e tyre.