Të paktën gjashtë të vrarë në Gaza, mes tyre kameramani i Al Jazeera-s dhe një fëmijë

Të paktën gjashtë persona, mes tyre një kameraman i Al Jazeera-s dhe një fëmijë, janë vrarë në sulmet e fundit izraelite në Rripin e Gazës, sipas autoriteteve shëndetësore lokale dhe ekipeve të shpëtimit. Ngjarja ka shkaktuar reagime të forta, ndërsa Al Jazeera akuzon Izraelin për shënjestrim të qëllimshëm të gazetarëve.

Rrjeti televiziv me bazë në Katar njoftoi se kameramani i Al Jazeera Live, Ahmed Wishah, u vra së bashku me dy persona të tjerë pas një bombardimi izraelit ndaj një shtëpie në kampin e refugjatëve Bureij, në qendër të Gazës. Al Jazeera e dënoi ashpër sulmin, duke e cilësuar atë si një “krim të urryer” dhe një shkelje të rëndë të ligjit ndërkombëtar.

Nga ana tjetër, Forcat Mbrojtëse të Izraelit (IDF) konfirmuan se kishin vrarë Wishah-un, por pretenduan se ai ishte pjesëtar i krahut ushtarak të Hamasit dhe kishte shërbyer si snajperist. Ushtria izraelite nuk publikoi prova për të mbështetur akuzat, por deklaroi se do të japë më shumë detaje në vijim.

Sipas autoriteteve lokale, dy persona të tjerë humbën jetën në të njëjtin sulm. IDF i akuzoi gjithashtu ata si anëtarë të Hamasit.

Vdekja e Ahmed Wishah vjen vetëm pak muaj pasi vëllai i tij, Mohamed Wishah, gjithashtu gazetar i Al Jazeera-s, u vra në një tjetër sulm izraelit. Edhe në atë rast, ushtria izraelite pretendoi se ai kishte lidhje me strukturat ushtarake të Hamasit.

Ndërkohë, katër anëtarë të një familjeje u vranë në një sulm tjetër në lagjen Sabra të qytetit të Gazës. Sipas Spitalit Shifa dhe dëshmive të familjarëve, mes viktimave ishin dy fëmijë dhe dy gra.

Familjarët e viktimave mohuan çdo lidhje me Hamasin. “Ata janë thjesht fëmijë të pafajshëm”, deklaroi për mediat një i afërm i familjes Safadi.

Sulme të tjera u raportuan edhe në pjesë të ndryshme të Gazës veriore dhe jugore, ndërsa armëpushimi i arritur muaj më parë vazhdon të përballet me akuza të ndërsjella për shkelje nga Izraeli dhe Hamasi.

Sipas Ministrisë së Shëndetësisë në Gaza, më shumë se 1,000 persona janë vrarë që nga hyrja në fuqi e armëpushimit tetorin e kaluar. Autoritetet lokale raportojnë gjithashtu se numri total i viktimave nga operacionet ushtarake izraelite që prej nisjes së luftës ka kaluar 73 mijë persona.

Konflikti aktual shpërtheu pas sulmit të Hamasit ndaj Izraelit më 7 tetor 2023, kur u vranë rreth 1,200 persona dhe u morën peng 251 të tjerë. Që prej asaj kohe, Gaza është përballur me një krizë të thellë humanitare, ndërsa organizatat ndërkombëtare paralajmërojnë se shumica e popullsisë vazhdon të ketë nevojë urgjente për strehim, ushqim, ujë të pijshëm dhe kujdes shëndetësor.

Al Jazeera cameraman Ahmad Wishah killed in Israeli attack in Gaza https://t.co/PzGZrjrt3t

— The Right News, Right Now. (@BradPorcellato) June 20, 2026