Të rinjtë kanë humbur besimin te politika, thonë aktivistët

Të rinjtë nga 18 deri në 24 vjeç nuk votojnë në masë, përkundrazi, ata përbëjnë grup moshën me përqindjen më të ulët të votimit, sipas KQZ-së.

Por, pse ndodh ky fenomen?

Studenti Gentjan Tufa, i ftuar në emisionin Mirmëngjes në Euronews, thotë se kjo ndodh për shkak të “shtypjes që qeveria aktuale po i bën popullit”.

“Ka pasur protesta pa fund që janë manipuluar e shtypur, për këtë ka humbur besimi të politika”, tha Tufa.

Gentjani sheh si arsye që të rinjtë nuk votojnë edhe “mungesën e një alternative më të mirë politike”, pasi opozita “nuk ka qenë bindëse”.

Ai thotë se të rinjtë e shmangin politikën dhe edukimin politik, gjë që i pengon të angazhohen si për të votuar, si për të ngritur zërin.

Edhe aktivisti Bislim Laknaj është i mendimit se të rinjtë duhet të jenë më të angazhuar për të sjellë ndryshimin në një realitet dukshëm jo të kënaqshëm, mirëpo e kanë humbur besimin te partitë politike.

“Ka një dëshpërim me partitë politike, të rinj përballen me një shoqëri të padrejtë dhe të pabarabartë”, tha Laknaj.