Seanca plenare e kësaj të enjteje u shoqërua me debate të shumta mes maxhorancës dhe opozitës në lidhje me kërkesën për arrestimin e ish-zv. kryeministrit Arben Ahmetaj.

Ishte kreu i grupit parlamentar demokrat, Gazment Bardhi, ai i cili i kërkoi Kryetares së Kuvendit të lajmërohej kryeministri Rama dhe të ishte i pranishëm në seancë.

Sipas Bardhit Rama duhet t’i lejë negociatat në telefon që po bën me Ahmetajn dhe duhet të vijë të përballet me opozitën në Kuvend.

“Kërkoj prezencën e kryeministrit në seancë plenare. Shqyrtojmë njëherë këtë kërkesë proceduriale dhe pastaj kalojmë te pika tjetër për ndryshimin e rendit të ditës”, tha Bardhi.

Bardhit iu përgjigj ministrja e Shtetit për Marrëdhëniet me Parlamentin, Elisa Spiropali, e cila tha se standardi i kryeministrit Rama është që nuk komenton vendimet e drejtësisë, por që e lë këtë të fundit të veprojë pa ndikime.

“Nëse ka një çështje që nuk na kompleksioni dot është raporti ynë me drejtësinë. Nëse doni t’u marrë shembull të pafundëm të raportit tonë me drejtësinë, ky është rasti. Ju jeni mësuar me kryeministra që për drejtësinë kanë folur nuk kanë vepruar.

Rama nuk flet mbi drejtësinë, nuk e komenton drejtësinë dhe nuk e përdor politikisht atë. Ai nuk e përdor si armë drejtësinë, nuk e përdor si hanxhar drejtësinë dhe nuk bën populizëm me të, por e lë të bëjë punën e saj”, tha Spiropali.