Teatri Metropol çel sezonin e ri me “Marmelladov”, reflektim mbi të tashmen

Me shfaqjen “Marmelladov”, të shkëputur nga kryevepra e Fyodor Dostojevskit “Krim dhe Ndëshkim”, Teatri Metropol ka hapur siparin e sezonit të ri artistik.
Me regji të Xhino Musollarit, shfaqja risjell ngjarjet e vitit 1866, por këtë herë e rikonceptuar ndryshe.

“Kjo shfaqje vjen e rikonceptuar për ta sjellë në mënyrë sa më realiste, qoftë si lojë, qoftë si atmosferë ose si një lojë skenike. Kam dashur t’i jap një copëz të saj, për mënyrën se si Dostojevski e ka shkruar atë, dhe sfida ka qenë për të kapur nivelin e shkrimit të Dostojevskit,” – thotë Xhino Musollari.

Mjeshtëria e autorit ndërthur jetët e individëve të ndryshëm të shoqërisë, ndërsa shfaqja kërkon që të përcjellë te publiku reflektim mbi të tashmen dhe problematikat e saj.

“Mesazhi është i gjithkoshëm, i përbotshëm; trajton problematikat sociale të njeriut, që është i ndarë mes ideologjisë së kultit të njeriut, besimit në Zot, problematikave të veseve që kanë individë të ndryshëm, dhe secili prej personazheve është projeksion i njëri-tjetrit. Secili ka nisur segmentin jetësor; targeti kryesor është vdekja,” – vijon Xhino Musollari.

“Marmelladov” do të ngjitet në skenën e Teatrit Metropol deri më datën 7 shtator.