Temat e nxehta në çmimin e madh të Japonisë në F1

Kjo është java e fundit përpara Çmimit të Madh të Japonisë në Formula 1 dhe askush nuk e kishte menduar që pas 3 garave, diferencat do të ishin vetëm 4 pikë mes dy skuadrave kryesore. Si dhe 11 të tjera mes katër pilotëve të parë në klasifikimin e tyre.

Gara e zhvilluar në Australi justifikoi pritshmëritë për episodet dramatike, por jo më pak pritet të jetë Suzuka. Ajo që të gjithë duan të shohin është se sa kërcënues do të jetë Ferrari ndaj Red Bull. Skuderia duket se është në një pozicion për të rritur presionin në gara të caktuara pas hapit përpara krahasuar me sezonin e shkuar.

Penaliteti i Fernando Alonso-s pritet të jetë një temë e nxehtë në konferencën për mediat gjatë ditës së enjte. Aksidenti i George Russell në Melbourne iu atribua spanjollit Fernando Alonso që rezultoi se frenoi më herët në kthesën numër 6 duke befasuar Mercedes-in pas tij.

Situata me shasinë te Williams iu mohoi ishullorëve ndonjë pikë të mundshme në Australi pas dëmtimit të makinës nga Albon në provat e lira. Megjithëse hyri në garë me makinën e Sargeant, sërish tailandezi nuk hyri dot në zonën e pikëve.

Tsunoda është në formë të mirë dhe pas mbërritjes në sesionin e 3’të kualifikues një vit më parë, këtë sezon duket më i shpejtë dhe konstant në paraqitjet e tij. Gjë që po e ndihmon të lërë pas shokun e skuadrës Ricciardo.

Në fund merkato e pilotëve pasi jo të gjithë kanë një vend të sigurt në sezonin e ardhshëm. Situatë e cila i bën ata më agresive dhe të motivuar për tu paraqitur në nivel sa më të lartë në garat e fundit të kontratave aktuale.

LEXONI GJITHASHTU:

• Vettel nuk e ka harruar ende Botërorin F1
• Piastri nuk ka iluzione, titulli në F1 është diçka shumë e vështirë