Tensione në Itali, Salvini kundër Von der Leyen: Të dielën votojmë ne, jo Brukseli

Kur e ndajnë më pak se dy ditë nga zgjedhjet, Italia është përfshirë nga një tensionim i situatës politike. Shkak është bërë një deklaratë e presidentes së Komisionit Evropian, Ursula von der Leyen, që ka paralajmëruar se Brukseli ka instrumente për të vepruar në rast se Italia zgjedh të shkojë kundër rrymës së Bashkimit Evropian.

“Do të shohim cili do të jetë rezultati i votimeve në Itali. Nëse gjërat do të marrin një drejtim të vështirë, atëherë do të përdorim instrumentet që kemi në dispozicion, si në rastin e Polonisë dhe Hungarisë”, ka deklaruar Von der Leyen.

Presidentja ka theksuar se, Unioni nuk është një grup ku një vend mund të bëjë pjesë dhe të thotë vetëm “dua këtë apo atë”.

“Në BE e kupton se e ardhmja jote varet edhe nga 26 vendet e tjera anëtare”, ka thënë Von der Leyen.

Megjithatë, ajo ka shtuar se Brukseli do të punojë me cilëndo qeveri demokratike që është e gatshme të bashkëpunojë.

Por deklarata nuk është mirëpritur nga lideri i Ligës së Veriut, Matteo Salvini, i cili e ka quajtur deklaratën një “kërcënim të ulët dhe arrogant”.

“Të dielën votojnë italianët, jo burokratët e Brukselit. Po të isha unë president i Komisionit Evropian do të shqetësohesha për faturat që duhet të paguajnë qytetarët”, ka thënë Salvini.

Salvini bën pjesë në koalicionin e djathtë, të përbërë edhe nga Forza Italia e Silvio Berlusconit dhe Vëllezërit e Italisë të Giorgia Melonit.

Si Salvini edhe Meloni njihen për marrëdhëniet e afërta me kryeministrin hungarez Viktor Orban dhe aprovojnë politikat radikale të tij.

LEXONI GJITHASHTU:

• Von der Leyen ka një paralajmërim për Italinë para zgjedhjeve
• Ç’ndodh nëse Italia bëhet shteti i parë që heq sanksionet ndaj Moskës? 
• Si Giorgia Meloni e ka çuar të djathtën ekstreme të Italisë në prag të pushtetit