Tensione në Kuvend, Ralf Gjoni dhe Halit Valteri ‘përplasen’ për listat e hapura

Seanca e sotme plenare shënoi edhe incidentin e parë ndërmjet deputetëve, që për pak sa nuk kaloi në konflikt fizik.

U desh ndërhyrja e deputetëve të tjerë për të ndaluar tensionet ndërmjet ligjvënësve që si shkak kishin nismën për ndryshimin e Kushtetutës.

“Po luan Taulant Balla në emër të grupit të PS që nxit ndryshime kushtetuese me emra deputetësh që nuk kanë folur një herë në jetën e tyre për listat e hapura dhe për ndryshimin e sistemit duke propozuar prag 5%”.

Kjo ishte deklarata e Ralf Gjonit që shkaktoi indinjatën dhe sa për pak nuk degjeneroi në konflikt fizik brenda vetë deputetëve të opozitës.

Kur ka kaluar më shumë se një vit nga plotësimi i karrigeve të lëna bosh nga Partia Demokratike dhe Lëvizja Socialiste për Integrim, në sallën e Kuvendit janë rikthyer sharjet dhe përplasjet fizike.

Në pamjet e marra nga regjia qendrore e Parlamentit, konflikti fizik ndërmjet dy deputetëve, Ralf Gjoni dhe Halit Valteri ishte gati të kalonte në përplasje fizike, gjë e cila u parandalua nga ndërhyja e kryetarëve të grupeve parlamentare opozitare, Nimet Musai dhe Myslym Murrzi.

Për propozimin e bërë nga 28 deputetë për ndryshimin e Kushtetutës reagoi edhe kryetari i Kuvendit Gramoz Ruçi i cili theksoi se në 30 qershor do të bëhet mbledhja e parë e Këshillit të Legjislacionit së bashku me Komisionin e Ligjeve dhe do të vijoi gjatë gjithë muajt korrik, duke paralajmëruar një verë të nxehtë negociatash dhe akuzash politike.