Tensionet në Lindjen e Mesme, anulohen disa prej udhëtimeve me anije drejt Evropës

Një numër i udhëtimeve të ardhshme me anije në Evropë janë anuluar pasi disa anije nuk kanë mundur të largohen nga portet në Gjirin Arabik për shkak të tensioneve rajonale. Konflikti i vazhdueshëm në Lindjen e Mesme ka detyruar operatorët të pezullojnë lundrimet dhe të riatdhesojnë mijëra pasagjerë të bllokuar.

Sipas Organizatës Ndërkombëtare Detare (IMO), rreth 15,000 pasagjerë të anijeve turistike kanë ngecur në rajon, me anije nga operatorë si MSC, TUI, Celestyal dhe AROYA të ankoruara në porte kyçe.

Celestyal Cruises njoftoi se anijet e saj mbeten në Gjirin Persik, Celestyal Discovery në Dubai dhe Celestyal Journey në Doha.

Të dyja anijet janë funksionale dhe gati për lundrim, por operatori ka anuluar dy udhëtime të planifikuara në ishujt grekë për në fund të marsit. Pasagjerëve të prekur do t’u ofrohet rimbursim i plotë ose kredi për udhëtime të ardhshme.

AROYA Cruises ka anuluar tërësisht pjesën e mbetur të sezonit dimëror në Gjirin Arabik, duke zbarkuar të gjithë pasagjerët në Dubai më 7 mars.

MSC Cruises ka organizuar fluturime riatdhesimi për më shumë se 1,500 pasagjerë nga bordi i MSC Euribia, duke i kthyer ata në destinacione përfshirë Mbretërinë e Bashkuar, Italinë, Gjermaninë, Spanjën, SHBA-në dhe Brazilin.

“Komanda dhe ekuipazhi ynë kanë punuar pa u lodhur për të siguruar që mysafirët tanë të kujdesen mirë dhe të kthehen në shtëpi të sigurt dhe në kohën e duhur”, tha kryetari ekzekutiv i MSC Cruises, Pierfrancesco Vago,

TUI Cruises njoftoi anulimin e udhëtimeve me Mein Schiff 4 deri më 23 mars dhe me Mein Schiff 5 deri më 12 mars. Udhëtimet e kthimit për pasagjerët dhe ekuipazhin po organizohen përmes fluturimeve çarter dhe vendeve të siguruara me linja ajrore.

Operatorët e lundrimit po monitorojnë situatën dhe do të rivendosin aktivitetin normal sapo të ketë kushte të sigurta në rajon.