Tensionet në Veri| Memli Krasniqi: Serbia fajtore, por Kurti ra në grackën e Vuçiç

Kryetari i Partisë Demokratike të Kosovës, Memli Krasniqi ka folur për herë të parë në një intervistë për Euronews Albania rreth tensioneve në veri të Kosovës.

Ai u shpreh se është presidenti serb Aleksandër Vuçiç që qëndron pas protestave të dhunshme, por për fat të keq kryeministri i Kosovës, Albin Kurti po bie në grackën e tij.

“Asnjë qytetar, asnjë banor i Kosovës nuk mund të ndihet mirë kur ne mund të kemi për herë të parë në historinë e ekzistencës tonë dënime dhe denoncime kaq të ashpra nga të gjitha nivelet e shteteve anëtare të QUINT-it dhe sidomos nga SHBA-ja, deri në nivelin e Sekretarit të Shtetit, zotit Blinken që fajëson Kosovën dhe kërkon të ndalen masat e dhunshme, janë fjali të cilat nuk e bëjnë askënd të ndihet mirë, por në këtë rast përgjegjësia është e kryeministrit që i ka marrë vendimet me kokën e tij, pa konsultuar askënd dhe në kundërshtim dhe me kërkesat e partnerëve tanë.

Normalisht që e di saktë dhe besoj më mirë se zoti Kurti se çfarë veprimesh për vite me radhë kanë ndërmarrë strukturat kriminale në veriun e vendit, por pse duhet kryeministri i Kosovës të bjerë në grackën e Aleksandër Vuçiçit, këtu është pyetja,” – u shpreh Krasniqi.

LEXONI GJITHASHTU:

• Krasniqi: Çfarë deklaron në Twitter anglisht, Kurti nuk e shkruan në Facebook shqip
• Bujar Osmani përkrah mbajtjen e zgjedhjeve të reja në veri të Kosovës