Tentoi të nxirrte nga Shqipëria 28,650 euro pa i deklaruar, procedohet 43-vjeçari

Policia Kufitare e Kakavijës ka proceduar penalisht një 43-vjeçar, i cili tentoi të kalonte kufirin me një shumë prej 28,650 eurosh pa e deklaruar.

43-vjeçari tentoi të nxirrte jashtë kufirit shqiptar shumën e padeklaruar, e cila u gjet në çantën e tij personale.

Shuma e parave u sekuestrua dhe u mor në cilësinë e provës materiale, ndërkohë që 43-vjeçari u procedua në gjendje të lirë për veprën penale “Mosdeklarimi në kufi i të hollave dhe i sendeve me vlerë”.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Gjirokastër, për veprime të mëtejshme.

“Në vijim të punës së shërbimeve të Policisë Kufitare, me qëllim parandalimin dhe goditjen e krimeve në kufi, në dalje të Shqipërisë, u krye kontroll në çantën e shtetasit F. R., ku u gjetën 28 650 euro, të cilat ky shtetas nuk i kishte deklaruar konform ligjit.

Në vijim të veprimeve procedurale për rastin, u referuan materialet në Prokurori, ku nisi procedimi në gjendje të lirë, për veprën penale “Mosdeklarimi në kufi i të hollave dhe i sendeve me vlerë”, për shtetasin F. R., 43 vjeç, banues në Tiranë. Gjithashtu, u sekuestrua në cilësinë e provës materiale, shuma e eurove”, thuhet në njoftimin e policisë.