Teuta: Dobi është nën kontratë me klubin! S’kemi rënë dakord me trajner tjetër

KF Teuta ka dalë me një reagim ndërsa ka saqruar se trajneri Enkeleid Dobi është nën kontratë me klubin dhe palët do të respektojnë marrëveshjen e firmosur në fillim të sezonit. Në reagim është hedhur poshtë pretendimet se klubi ka rënë dakord me një trajner tjetër.

Klubi thekson se garanton tifozët se projekti i tyre është ambicioz dhe nuk do të lejojnë askënd të përbaltë punën e tyre. Sipas reagimit, drejtuesit e klubit dhe stafi teknik janë të fokusuar maksimalisht vetëm te fusha e blertë, me synimin për ta mbyllur me sukses kampionatin dhe për të ruajtur stabilitetin e projektit.

“Ndeshja e radhës ndaj Elbasanit është një sfidë vendimtare, dhe e gjithë vëmendja është përqendruar te kundërshtari dhe përgatitja e ekipit. Ftojmë tifozët të na mbështesin në këtë moment të rëndësishëm të sezonit”, thuhet në reagim ndër të tjera.