Thatësira ‘pushton’ Italinë, shkatërrohen të mbjellat

Shenjat e thatësirës po duken në të gjithë veriun e Italisë, në toka e të mbjella.

Armando Tamagni shprehet se 30% e arave të mbjella me misër janë shkatërruar sepse nuk kanë pasur mjaftueshëm ujë.

“Jam 40 vjec.  Ata që janë më të vjetër shprehen se nuk e kanë parë kurrë një situatë të tillë. Uji ndonjëherë ishte i pakët, por gjithmonë mjaftonte për të ujitur. Nga pikëpamja ekonomike është një humbje e madhe për të gjithë sektorin bujqësor dhe agro-ushqimor”, u shpreh ai.

Në këtë anije të vogël në lumin Po, pasojat e thatësirës duken qartazi.

Niveli aktual i lumit është të paktën 2 metra nën nivelin e verës së kaluar. Dikur ishte një kënaqësi, por sot shëtitjet me varkë janë kthyer në një  vozitje me plot pengesa.

Autoritetet lokale, rajonale dhe kombëtare janë nën presion për të gjetur zgjidhje.

Drejtori i Përgjithshëm i Agjencisë së Lumit Po thotë se kjo është urgjenca e gjashtë në rajon në 20 vitet e fundit. Ai këmbëngul se ngrohja globale do të vijojë , kështu që strategjitë  duhet të jenë  urgjente.

“Ne duhet të investojmë në mënyrë që kjo të mos ndodhë më. Duhet të jemi në gjendje të mbledhim ujin kur bie shi dhe ta lëshojmë  kur ka nevojë. Duhet të projektojmë objektet e menaxhimit të ujit me një qasje të ndryshme, në mënyrë që uji mund të ripërdoret për bujqësi. Duhet të përmirësojmë kanalet , pasi rrjedhjet do të thotë se po harxhojmë 40 për qind të ujit . Duhet të modernizojmë edhe sistemet e ujitjes, që të plotësojnë kriteret e reja të inovacionit dhe teknologjisë”, u shpreh Meuccio Berselli, menaxher i përgjithshëm.

Ekspertët thonë se nevojiten urgjentisht edhe fushatat e ndërgjegjësimit të publikut për rëndësinë e kursimit të ujit.

LEXONI GJITHASHTU:

• Thatësira në Itali, situata më e rëndë në 70 vjet
• Thatësira kërcënon Italinë, shterojnë lumenjtë, kufizohet përdorimi i ujit