Shtetet e Bashkuara kanë njoftuar vendosjen e taksave të reja për anijet e prodhuara nga Kina që do të ankorojnë në portet amerikane, me një lëvizje që rrezikon të revolucionarizojë akset e tregtisë globale dhe të rrisë tensionet me Pekinin.
Sipas propozimit të hartuar nga administrata Trump, tarifat do të hyjnë në fuqi pas 6 muajsh dhe do të prekin edhe pronarët dhe operatorët kinezë të anijeve që nuk janë prodhuar në Kinë, ka deklaruar përfaqësuesi i SHBA për tregtinë.
Tarifat do të aplikohen për çdo vizitë në Shtetet e Bashkuara dhe maksimumi 5 herë në vit për anije, saktësohet në një komunikatë zyrtare.
Departamenti i Tregtisë ka njoftuar gjithashtu tarifa specifike për mjetet lundruese që janë ndërtuar jashtë shtetit e që transportojnë automjete, të cilat do të hyjnë në fuqi pas 180 ditësh. Tarifa do të ketë edhe për kë transporton gaz natyral të lëngshëm.
Lëvizja synon të ripërtërijë fuqinë e flotës tregtare amerikane dhe t’i përgjigjet politikave, veprimeve dhe praktikave të paarsyeshme të Kinës, që synon sipas Uashingtonit të dominojë sektorin detar dhe logjistik të marinës.
Në 2024-n, presidenti i atëhershëm Joe Biden urdhëroi Departamentin e Tregtisë të hetonte mbi praktikat e paligjshme të gjigantit aziatik në industrinë detare.
Hetimi u vazhdua nga presidenti Donald Trump, i cili në fillim të marsit njoftoi edhe ngritjen e një zyre për rindërtimin e marinës tregtare.
Pasi dominoi vitet dhe dekadat pas fundit të Luftës së Dytë Botërore, industria detare amerikane ka humbur vazhdimisht terren dhe sot përbën vetëm 0.1 për qind të saj në nivel botëror, me primatin që i ka kaluar Azisë.
Kina sot ndërton thuajse gjysmën e anijeve, duke ia kaluar Koresë së Jugut dhe Japonisë. Sipas OKB, tre vendet aziatike përfaqësojnë 95 për qind të anijeve civile të ndërtuara.
LEXONI GJITHASHTU:
- Pas pezullimit të tarifave nga Trump, edhe BE heq kundërmasat ndaj SHBA
- Trump pezullon me 90 ditë tarifat e reja, përveç Kinës, të cilës i rriten në 125%
- Efektet e tarifave të Trump dhe lufta tregtare, bie besimi në ekonminë amerikane