EMRAT/ Thyen rregulloren, përjashtohen nga radhë e policisë tre efektivë

Policia e Shtetit ka përjashtuar nga radhët e saj tre punonjës për shkelje të rëndë të rregullores së policisë së shtetit.

Rekomandimi për përjashtimin e efektivë ka ardhur nga Drejtoria e Standardeve pas një hetimi të kryer, të cilët i kanë rekomanduar Drejtorit të Përgjithshëm të Policisë përjashtimin e fektivë.

Punonjësit e policisë të përjashtuar janë një efektivi i Shqiponjave në Tiranë, Ylber Dybeli,  inspektori në Elbasan, Redi Mato, si dhe inspektori në komisariatin e Tiranës, Renato Feri.

“Drejtori i Përgjithshëm i Policisë së Shtetit ka miratuar përjashtimin nga radhët e Policisë së Shtetit, të punonjësve të Policisë:

– Inspektor Y. D., me detyrë trup shërbimi në Sektorin e Forcës së Posaçme “Shqiponja”, në Drejtorinë Vendore të Policisë Tiranë. Ky punonjës policie u pezullua nga detyra, në datën 22.12.2022, pasi gjatë kohës që ka qenë jashtë orarit të shërbimit është konfliktuar me efektivët e Komisariatit të Policisë Rrugore Tiranë;

– Inspektor R. M., me detyrë trup shërbimi/OPP, në Seksionin për Rendin, në Komisariatin e Policisë Elbasan, në Drejtorinë Vendore të Policisë Elbasan, pasi në datën 21.12.2022, është konfliktuar me punonjësin e policisë E. H., gjatë kohës që të dy kanë qenë jashtë orarit të shërbimit;

– Inspektor R. F., me detyrë trup shërbimi, në Seksionin e Sigurisë dhe Objekteve, në Komisariatin Rajonal të Policisë Rrugore, në Drejtorinë Vendore të Policisë Tiranë, pasi kur është ndaluar nga shërbimet e Forcës së Posaçme “Shqiponja”, për të ushtruar kontroll në automjetin e tij, i ka kundërshtuar, ofenduar dhe kanosur ata”, thuhet në njoftimin e policisë.

Gjithashtu policia njoftoi shtyrjen e  afatit të gradimit për 2 vjet për punonjësin e policisë Ervis Hasa, pasi ky i fundit ka patur një zënkë me një tjetër punonjës policia gjatë kohës që të dy kanë qenë jashtë shërbimit.

“Gjithashtu, në vijim të hetimeve të kryera, Drejtoria e Standardeve Profesionale në Policinë e Shtetit ka marrë vendimin, të cilin e ka miratuar Drejtori i Përgjithshëm i Policisë së Shtetit, për caktimin e masës disiplinore “Shtyrja e afatit të gradimit për 2 vjet”, për punonjësin e Policisë E. H., me detyrë trup shërbimi/OPP, në Seksionin për Rendin, në Komisariatin e Policisë Elbasan, në Drejtorinë Vendore të Policisë Elbasan, pasi më datë 21.12.2022, është konfliktuar me punonjësin e policisë R. M., gjatë kohës që të dy kanë qenë jashtë shërbimit”, njoftoi policia.