“Tiranathlon” në Liqenin e Farkës, sportistë nga gjithë bota garojnë në not, vrap dhe çiklizëm

Me dhjetëra të rinj dhe të reja të pasionuar pas sporteve morën pjesë sot në garën “Tiranathlon” të zhvilluar në zonën e liqenit të Farkës në Tiranë. Aktiviteti i organizuar nga bashkia e Tiranës dhe Ambasada greke në vendin tonë vuri në garë sportistët në tri disiplina të ndryshme, çiklizëm, not dhe vrap 5 km.

Gara startoi paraditen e sotme, në orën 10.00 dhe u zhvillua në ambientet krejtësisht të reja të “Parkut Helen”, në Liqenin e Farkës në periferi të Tiranës, e cila u përurua dy ditë më parë nga kryebashkiaku i Tiranës Erion Veliaj dhe homologu i tij në Athinë, Kostas Bakojanis.

“Parku Helen” është konceptuar si një variant pushimi për ata banorë të Tiranës që jo vetëm duan të shplodhen, por njëkohësisht të argëtohen, të marrin pjesë në aktivitete kulturore dhe sportive.

Në garën e sotme, sportistët në “Tiranathlon” morën pjesë në gara noti 750 metra, garë çiklistike 20 km, dhe ecje sportive 5 km për burra dhe gra. Qëllimi është që të sanksionohet si një trigarësh i rëndësishëm ndërkombëtar, tek i cili do të fokusohet për vit interesimi botëror i botës sportive në kryeqytetin shqiptar.

Në garën “Tiranathlon” këtë vit morën pjesë sportistë nga Gjermania, Italia, Mali i Zi, Maqedonia e Veriut, Austria dhe natyrisht nga Shqipëria dhe Greqia.