Tjetër masakër civile në Nigeri, persona të armatosur vrasin të paktën 17 fermerë dhe plagosin 13

Të paktën 17 fermerë u vranë dhe 13 u plagosën në një sulm nga persona të armatosur në veriperëndim të Nigerisë, thanë sot zyrtarët lokalë dhe banorët.

Sulmi ndodhi të premten në qytetin Goron Namaje në zonën Maradun të shtetit Zamfara në veriperëndim të Nigerisë, raporton AP, duke vënë në dukje se asnjë grup nuk ka marrë përgjegjësinë për sulmin e fundit nga bandat e armatosura.

“Fermerët po punonin në fushat e tyre kur banditët i sulmuan papritur dhe vranë 17 fermerë”, tha Shehu Musa, një banor i Maradunit.

Ai shtoi se të plagosurit po trajtohen në një spital aty pranë.

“Ky sulm është rezultat i refuzimit të qeverisë së shtetit Zamfara për të negociuar me personat e armatosur”, tha Sanusi Dosara, kryetari i qeverisë lokale të Maradun.

Dosara u bëri thirrje forcave qeveritare që të shkatërrojnë kampin Bayan-Ruva në pyllin Maradun ku janë fshehur sulmuesit.

Të enjten, 39 persona u rrëmbyen në Magamin Didi, një vendbanim në Maradun, ndërsa vendasit po bisedonin me prindërit e një të dyshuari si udhëheqës banditësh në një përpjekje për të negociuar paqen dhe për të zgjidhur problemin e rrëmbimeve të shpeshta.

Sipas të dhënave të Kombeve të Bashkuara, dhuna dhe rrëmbimet nga bandat e armatosura në Nigerinë verilindore kanë vrarë mijëra njerëz dhe kanë zhvendosur miliona, pavarësisht premtimeve të përsëritura të Presidentit nigerian Bola Tinubu për të frenuar krizën në Nigerinë veriperëndimore.