Lideri çeçen, Ramzan Kadyrov, ka thënë të shtunën se forcat e tij janë të gatshme të ndihmojnë në shtypjen e rebelimit të grupit Wagner.

Duke iu drejtuar luftëtarëve të Wagner-it, Kadyrov tha: “Çfarëdo qëllimi që t’ju jepet, pavarësisht se çfarë premtimesh ju thonë – siguria e shtetit dhe kohezioni i shoqërisë ruse në një moment të tillë është mbi gjithçka tjetër! Shihni se si armiqtë tanë në Perëndim po përfitojnë nga kjo situatë… Këto janë pasojat e pritshme të marshimit tradhtar të Prigozhinit”.

Ai foli gjithashtu për një “tradhti të ndyrë” nga Prigozhin.

Në një deklaratë të gjatë në Telegram, Kadyrov tha: “Unë kam paralajmëruar vazhdimisht se lufta nuk është koha për të shprehur ankesat personale dhe për të zgjidhur mosmarrëveshjet në prapavijën tonë. Pjesa e pasme duhet të jetë gjithmonë e qetë dhe e besueshme. Imagjinoni si ndihen tani djemtë në llogore, përballë të cilëve ka një armik, dhe pas shpine një aventurë të pabesë. Po flasim për stabilitet, për kohezionin e shtetit, për sigurinë e qytetarëve”.

Kadyrov vazhdoi: “Ne kemi një Komandant të Përgjithshëm Suprem, të zgjedhur nga populli, i cili e njeh të gjithë situatën deri në detajet më të vogla më mirë se çdo strateg”.

Duke iu referuar fjalimit të Presidentit Putin drejtuar kombit të shtunën, ai tha: “Vladimir Vladimirovich vuri në dukje me të drejtë në fjalimin e tij drejtuar kombit – ky është një rebelim ushtarak! Nuk ka asnjë justifikim për veprime të tilla! Unë e mbështes plotësisht çdo fjalë të Vladimir Vladimirovich Putin!

LEXONI GJITHASHTU:

• Wagner nuk tërhiqet, Prigozhin: Të 25.000 jemi gati të vdesim përballë ushtrisë ruse
• Putin i drejtohet kombit, teksa kreu i Wagner udhëheq revoltën kundër ushtrisë ruse