Trafikuan mbi 6 tonë drogë, dalin sot para GJKKO anëtarët e grupit kriminal

Dalin sot para GJKKO te arrestuarit e operacionit “OROLOGI” te dyshuar si pjese e një grupi kriminal që ka trafikuar mbi 6 tonë lëndë narkotike të sekuestruara me vlerë tregu prej 411 milionë eurosh

Seanca për vlerësimin e masave të sigurisë pritet te nisë ne orën 9:00 me dyer të mbyllura.

SPAK zbuloi dhe goditi një rrjet të madh ndërkombëtar të trafikut të drogës me 16 persona nën hetim dhe mbi 6 tonë lëndë narkotike të sekuestruara, me një vlerë tregu prej 411 milionë eurosh.

Hetimet, të zhvilluara në bashkëpunim me EUROPOL, EUROJUST dhe autoritetet e drejtësisë në BE, zbuluan një strukturë kriminale të sofistikuar me shtrirje në disa kontinente.

Në total janë hetuar 16 persona për veprat penale të “trafikimit të narkotikëve”, “grup kriminal i strukturuar” dhe “kryerje e veprave penale nga grupi i strukturuar kriminal”.

Grupi operonte në trafik ndërkombëtar kokaine dhe hashashi, me ngarkesa që nisnin nga Kolumbia e Ekuadori dhe mbërrinin në porte evropiane si Rotterdam, Anvers, apo përmes Tunelit të Kanalit drejt Mbretërisë së Bashkuar. Droga fshihej në paleta me dru, banane apo kakao. Operacionet u financuan përmes sistemit informal të pagesave “Hawala”, duke shmangur bankat tradicionale.