Transkriptet e publikuara për 21 janarin, ish-prokurorja tregon si rihapet hetimi

Ish-prokurorja e Krimeve të Rënda, Elisabeta Imeraj thotë se transkriptet e publikuara, ku ish-komandanti i gardës, Ndrea Prendi komunikonte dhe i jepte urdhra vartësve të tij duhet të analizohet dhe të detajohet.

Në emisionin “Review” në Euronews Albania, Imeraj nënvizoi se nëse dalin detaje të reja, mund të ketë sërish hetim për këtë çështje, edhe  pas ndryshimit të nenit 449, sipas së cilës, nuk mund të hetohet një çështje për të cilën gjykata ka marrë vendim.

“Në aspektin dokumentar, të të gjithave provave të administruara në dosje, ne nuk kemi sot një dijeni, apo një të dhënë konkrete, prej së cilës të burojë si provë, që ky urdhri është nga një person, çfarëdo lloj pozicioni që ai të ketë pasur. I referohem deklarimeve të personave të pyetur. Në këtë drejtim, nëse ka dhe burojnë veprime të tjera hetimore, që propozohen, qoftë edhe nga ky audiopërgjimi që disponon zoti Hoxha, që mund të merret, të analizohet, detajohet dhe i jepet rruga për të vijuar në hetime, atëherë neni 449, nuk afekton pjesën e gjësë së gjykuar që lidhen me subjekte që kanë marrë një vendim.

Ne nuk mund të ngremë një akuzë të re, për subjekte të cilat drejtësia e ka dënuar për atë fakt. Nëse në raport me hetimet që po zhvillohen për gjetjen e autorësisë për vrasjen e Aleks Nikës, dalin detaje që e  lidhin me këtë në tërësi, nuk e pengon njeri që të vazhdojë hetimet në këtë aspekt”, theksoi ajo.

LEXONI GJITHASHTU

• ‘Kallëzues profesonist, hedh shashka’ | Debat mes avokatëve për 21 janarin
• ‘Ligji i PS-së pengon rihetimin e 21 janarit’, avokatët përplasen në studio
• Genc Gjokutaj: Si ndërhynë amerikanët për 21 janarin