Trump: Askush nuk ka asnjë ide se kush do ta drejtojë përfundimisht Iranin

Presidenti amerikan, Donald Trump tha të hënën se askush nuk ka asnjë ide se kush do ta drejtojë Iranin pas vrasjes së Ajatollah Ali Khamenei-t, pavarësisht se djali i tij, Mojtaba Khamenei, është emëruar udhëheqësi i ri suprem i vendit.

“Udhëheqësit e tyre terroristë janë zhdukur, ose po numërojnë minutat derisa ata të zhduken”, tha Trump në një takim të republikanëve të Dhomës së Përfaqësuesve në Florida.

“Askush nuk ka asnjë ide se kush janë njerëzit që do të jenë në krye të vendit”, shtoi ai.

Trump, i cili më parë e ka cilësuar Mojtaba Khamenein si një zgjedhje të papranueshme për të udhëhequr Iranin, ka këmbëngulur se ai duhet të luajë një rol në zgjedhjen e kreut të ri të vendit.

Ai gjithashtu ka lënë të kuptohet se forcat amerikane dhe izraelite mund ta synojnë Mojtaba Khamenein. Trump ka deklaruar se nëse ai nuk merr miratimin e SHBA, nuk do të zgjasë shumë.

Trump gjithashtu e përshkroi luftën e vazhdueshme në Iran si një ekskursion afatshkurtër.

“Vendi ynë po ecën shumë mirë. Dua të them, në një nivel që askush nuk e mendonte. Bëmë një ekskursion të vogël sepse ndienim sikur duhej ta bënim atë për të hequr qafe ndonjë të keqe. Mendoj se do ta shihni se do të jetë një ekskursion afatshkurtër”, tha presidenti.