Presidenti i Shteteve të Bashkuara, Donald Trump, ka vendosur të dërgojë një ekip zyrtarësh të lartë në Arabinë Saudite për të nisur bisedimet me Rusinë dhe Ukrainën, me synimin për t’i dhënë fund luftës gati trivjeçare, thanë zyrtarë amerikanë.
Në delegacionin amerikan do të marrin pjesë Sekretari i Shtetit, Marco Rubio, Këshilltari për Sigurinë Kombëtare, Mike Waltz, dhe negociatori për Lindjen e Mesme, Steve Witkoff. Megjithatë, Keith Kellogg, i dërguari i Trumpit për Ukrainën dhe Rusinë, nuk pritet të jetë pjesë e bisedimeve. Nuk është bërë ende e ditur data e saktë e takimeve në Arabinë Saudite.
Ndërkohë, Rubio mbërriti në Izrael më 15 shkurt, pas pjesëmarrjes në Konferencën e Munihut. Departamenti Amerikan i Shtetit konfirmoi se ai zhvilloi një bisedë telefonike me ministrin e Jashtëm rus, Sergei Lavrov, në kuadër të përpjekjeve për një marrëveshje paqeje. Në një deklaratë zyrtare, Departamenti i Shtetit theksoi se biseda ndodhi pas një telefonate mes Trumpit dhe presidentit rus, Vladimir Putin, më herët gjatë javës.
“Sekretari ritheksoi angazhimin e presidentit Trump për të gjetur një zgjidhje për konfliktin në Ukrainë. Përveç kësaj, ata diskutuan mundësinë e bashkëpunimit në një sërë çështjesh të tjera dypalëshe”, thuhet në komunikatë. Ministria e Jashtme e Rusisë konfirmoi se të dy palët ranë dakord të mbajnë një kanal të hapur komunikimi për të trajtuar çështjet në marrëdhëniet SHBA-Rusi.
Ndërkohë, presidenti i Ukrainës, Volodymyr Zelensky, dhe liderët e Bashkimit Evropian kanë shprehur kundërshtimin e tyre ndaj zhvillimit të këtyre bisedimeve pa përfshirjen e negociatorëve të tyre.
LEXONI GJITHASHTU:
- Lavrov dhe Rubio dakordësohen për përgatitjen e takimit Putin-Trump
- Liderët evropianë vendosin të mbajnë një samit emergjent për Ukrainën
