Trump flet para takimit me Putin: Do përpiqemi t’i rikthejmë Ukrainës tokën e vet

Presidenti i SHBA-së, Donald Trump, tha se do të përpiqet t’i rikthejë Ukrainës disa territore gjatë takimit të tij me presidentin rus, Vladimir Putin, të premten.

“Rusia ka pushtuar një pjesë të madhe të Ukrainës. Ata kanë pushtuar territorin më të rëndësishëm. Ne do të përpiqemi t’ia kthejmë Ukrainës një pjesë të atij territori”, tha ai në një konferencë për shtyp, shkruan BBC.

Trump tha se bisedimet në Alaska do të ishin një “takim parashikues” që synonte t’i kërkonte Putinit t’i jepte fund luftës dhe se do të kishte “disa shkëmbime territoresh, ndryshime në territor”.

Ai tha se do t’i informojë udhëheqësit evropianë nëse Putini propozon një “marrëveshje të drejtë” gjatë bisedimeve, duke shtuar se do të fliste së pari me Zelenskyn.

“Do ta telefonoj i pari… Do ta telefonoj më pas dhe mund t’i them, ‘shumë fat, vazhdo të luftosh’, ose mund të them, ‘mund të bëjmë një marrëveshje’, tha ai.

Trump njoftoi takimin të premten e kaluar – dita e afatit të tij të vetëimponuar që Rusia të binte dakord për një armëpushim ose të përballej me më shumë sanksione të SHBA-së.

Në përgjigje të lajmit për samitin e Alaskës, Zelensky tha se çdo marrëveshje pa kontribut nga Kievi do të përbënte “vendime të vdekura”.