Trump: Nuk do të dërgoj trupa në Lindjen e Mesme

Presidenti i SHBA-së, Donald Trump, tha gjatë një takimi në Shtëpinë e Bardhë me kryeministren japoneze Sanae Takaichi se nuk po shqyrton dërgimin e më shumë trupave në Lindjen e Mesme, për shkak të luftës me Iranin.

“Nuk po dërgoj trupa askund”, tha Trump, duke iu përgjigjur pyetjes së një gazetari nëse planifikonte të rriste praninë ushtarake në rajon. “Nëse do ta bëja, sigurisht që nuk do t’jua thoja. Por nuk po dërgoj trupa”, theksoi ai.

Trump ka sulmuar aleatët për mbështetjen e tyre të vakët për fushatën SHBA-Izrael dhe ka thënë se SHBA-të nuk kanë nevojë për ndihmë. Por ai vazhdon të shtyjë për më shumë anije për të pastruar minat dhe për të shoqëruar tankerat përmes Ngushticës së Hormuzit.

Përpara takimit, Japonia, së bashku me pesë vende evropiane – Britaninë, Francën, Gjermaninë, Italinë dhe Holandën – në një deklaratë të përbashkët theksuan se do të merrnin masa për të stabilizuar tregjet e energjisë dhe se ishin gati të merrnin pjesë në “përpjekjet e duhura” për të siguruar kalim të sigurt nëpër Ngushticë.

Trump e quajti fitoren zgjedhore të Takaichi muajin e kaluar “historike”, ndërsa e priti atë në Zyrën Ovale. “Ne kemi pasur mbështetje të jashtëzakonshme dhe kemi një marrëdhënie të shkëlqyer me Japoninë për gjithçka. Mendoj se ata po e ngrenë vërtet standardin… ndryshe nga NATO”, tha Trump.

Ai shtoi se pret që Japonia të rrisë kontributin e saj, duke pasur parasysh mbështetjen që ofrojnë Shtetet e Bashkuara dhe dhjetëra mijëra trupa që mban në vend. “Nuk kemi nevojë për shumë, nuk kemi nevojë për asgjë”, tha Trump. “Nuk kemi nevojë për asgjë nga Japonia apo nga askush tjetër. Por mendoj se është e drejtë që të tjerët të marrin një rol më të madh”.

Takaichi i tha Trump se ajo ka “sjellë propozime konkrete për uljen e tensioneve në krizën globale të energjisë” dhe theksoi se Irani nuk duhet të pajiset kurrë me armë bërthamore.

Takaichi dënoi sulmet e Iranit në Ngushticën e Hormuzit dhe tha se beson që vetëm Trump mund të arrijë paqen . Ajo shtoi gjithashtu se ekonomia globale pritet të pësojë një goditje për shkak të konflikteve në Lindjen e Mesme.