Trump kërcënon BE-në me tarifa: Blejmë gjithçka prej tyre, ata asgjë prej nesh

Presidenti i Shteteve të Bashkuara, Donald Trump, ka lënë të kuptohet se Bashkimi Evropian mund të jetë objektivi i radhës për vendosjen e tarifave tregtare. Ky paralajmërim vjen pas vendimit të administratës së tij për të aplikuar tarifa prej 25% për mallrat nga Meksika dhe Kanadaja, si dhe një taksë shtesë prej 10% për importet nga Kina.

Gjatë një deklarate për mediat në Maryland, pas kthimit nga Florida, Trump i tha BBC-së se tarifat mbi mallrat evropiane mund të vendosen “shumë shpejt”.

“Ata nuk i marrin makinat tona, nuk i marrin produktet tona bujqësore, nuk marrin pothuajse asgjë, ndërsa ne importojmë gjithçka prej tyre: miliona makina, sasi të mëdha ushqimesh dhe produkte bujqësore,” deklaroi presidenti amerikan.

Në të njëjtën kohë, Trump theksoi se ka marrëdhënie të mira me kryeministrin britanik, Sir Keir Starmer, dhe beson se çështjet tregtare me Mbretërinë e Bashkuar mund të zgjidhen. “Mbretëria e Bashkuar ka qenë jashtë linjës, por unë mendoj se një marrëveshje mund të arrihet”, tha ai.

Bashkimi Evropian, i përbërë nga 27 vende anëtare, ka dënuar vendimin e Trump për të vendosur tarifa mbi Kanadanë, Meksikën dhe Kinën, duke paralajmëruar se do të “përgjigjet me vendosmëri” nëse bëhet gjithashtu një objektiv i masave të reja tregtare.

Ndërkohë, Meksika dhe Kanadaja kanë deklaruar se do të marrin masa hakmarrëse, ndërsa Kina ka bërë të ditur se mund të aplikojë “masa të kundërta korresponduese”.

Sekretari britanik i biznesit, Jonathan Reynolds, ka argumentuar se Mbretëria e Bashkuar duhet të përjashtohet nga çdo tarifë, duke theksuar se SHBA nuk ka një deficit tregtar me Britaninë, një faktor kyç në politikat tregtare të administratës Trump.

Tarifat kanë qenë një element qendror i politikës ekonomike të Trump, i cili i sheh ato si një mënyrë për të mbrojtur industrinë dhe vendet e punës në SHBA, si dhe për të rritur të ardhurat nga taksat. Megjithatë, shumë ekonomistë paralajmërojnë se këto masa mund të rezultojnë në çmime më të larta për konsumatorët amerikanë dhe mund të nxisin vende të tjera që të reduktojnë varësinë e tyre nga tregu amerikan, duke ndikuar negativisht në ekonominë globale.

Ndërkohë, mbetet për t’u parë se cilat do të jenë veprimet e ardhshme të administratës Trump dhe si do të reagojë Bashkimi Evropian nëse tarifat e reja bëhen realitet.

LEXONI GJITHASHTU:

• “Do t’ju gjejmë dhe do ju vrasim…” Trump urdhëron sulme ndaj IS-it në Somali
• Trump vendosi tarifa, kundërpërgjigjen Kanadaja dhe Meksika