Trump njofton ndryshimin e emrit të Ministrisë së Mbrojtjes në Ministrinë e Luftës

Presidenti i SHBA-së, Donald Trump, tha se administrata në Uashington do ta ndryshojë emrin e Ministrisë së Mbrojtjes në Ministrinë e Luftës në ditët në vijim, me qëllim që Pentagonit t’i rikthehet “etosi i luftëtarit”.

Emri zyrtar i Pentagonit pas Luftës së Dytë Botërore ishte Departamenti i Luftës, dhe Trump më parë e kritikoi ndryshimin e emrit në Departamentin e Mbrojtjes, raporton Politico.

“Kur fituam Luftën e Parë Botërore, Luftën e Dytë Botërore, ajo quhej Ministria e Luftës. Dhe për mua, kjo është vërtet ajo që është”, tha Trump në një konferencë për shtyp me Presidentin e Koresë së Jugut Lee Jae-myung.

Departamenti i Luftës ekzistonte nga viti 1789 deri në vitin 1947, kur administrata e Presidentit Harry Truman e ndau departamentin në Ushtri dhe Forca Ajrore dhe e bashkoi atë me Marinën e pavarur të asaj kohe.

Truman e quajti agjencinë e re në nivel kabineti Departamenti i Mbrojtjes dhe kishte ndërmend që ndryshimi i emrit t’i jepte shefit të Pentagonit autoritet më të centralizuar mbi degët e veçanta të ushtrisë, veçanërisht Marinën, e cila gëzonte pavarësi të konsiderueshme deri në fund të Luftës së Dytë Botërore.

Trump ka lënë të kuptohet mundësinë e rikthimit të këtij emri javët e fundit, duke e quajtur Sekretarin e Mbrojtjes Pete Hegseth “Sekretarin e Luftës” të tij në një samit të NATO-s në qershor.

“Nëse shikoni ndërtesën e vjetër pranë Shtëpisë së Bardhë, mund të shihni se ku ndodhej dikur Sekretari i Luftës. Pastaj u bëmë politikisht korrektë dhe e emëruan Sekretar të Mbrojtjes”, tha Trump, duke theksuar rëndësinë si të mbrojtjes ashtu edhe të ofensivës.

LEXONI GJITHASHTU:

• Presidenti i Koresë së Jugut i kërkon Trumpit të takohet me Kim Jong Un
• Trump urdhëron masa ndëshkuese ndaj djegies së flamurit amerikan