Trump paraqitet në gjykatë, ish-presidenti pretendon se është i mbrojtur me imunitet

Ish-presidenti amerikan Donald Trump ishte i pranishëm të martën në Gjykatën e Apelit në Uashington.

Ai po kërkon të shmangë akuzat ndaj tij për tentativë për përmbysje të rezultatit të zgjedhjeve me argumentin se mbrohet nga ndjekja penale falë imunitetit presidencial.

Trump pretendon se një ish-president nuk mund të vihet në gjyq për ndonjë krim që lidhet me zyrën, përveç nëse për herë të parë është fajësuar dhe dënuar nga Kongresi. Ai gjithashtu akuzon demokratët se përpiqen ta mbajnë atë larg nga presidenca.

Ish-presidentët gëzojnë imunitet të gjerë nga paditë për veprimet e ndërmarra si pjesë e detyrave të tyre zyrtare në Shtëpinë e Bardhë.

Por për shkak se asnjë ish-president përpara Trump nuk është paditur ndonjëherë, gjykatat nuk kanë trajtuar kurrë më parë nëse kjo mbrojtje shtrihet në ndjekjen penale.

LEXONI GJITHASHTU:

• Zgjedhjet në SHBA/ Shtuni: Po shkohet drejt një përballjeje të dytë Trump-Biden
• Gjykata e Lartë do përcaktojë nëse Trump mund të përjashtohet nga fletët e votimit