Trumpi gjeneralëve ushtarakë: Qytetet amerikane të jenë vende stërvitjeje ushtarake

Presidenti amerikan, Donald Trump gjatë një fjalimi të mbajtur para qindra udhëheqësve ushtarakë të mbledhur nga e gjithë bota ka shprehur se do të përdorë qytetet amerikane si “fusha stërvitjeje” për ushtrinë.

Trump gjatë fjalës së tij i përshkroi trazirat civile si armik të brendshëm. Presidenti përsëriti kritikat e tij ndaj qyteteve të udhëhequra nga demokratët përfshirë San Franciskon, Çikagon, Nju Jorkun dhe Los Anxhelosin. Ai tregoi se do të vazhdonte politikën e tij të përdorimit të ushtrisë për zbatimin e ligjit.

“Janë vende shumë të pasigurta dhe ne do t’i rregullojmë një nga një”, tha ai. Trump shtoi kontrolli i territorit fizik të kufijve amerikan është thelbësor për sigurinë kombëtare.

Eventi filloi me një fjalim nga sekretari amerikan i Mbrojtjes, Pete Hegseth i cili njoftoi se ushtria amerikane do të kërkojë që luftëtarët të përmbushin “standardin më të lartë mashkullor” në testet e fitnesit fizik. Hegseth pranoi se ky veprim mund të përjashtojë disa gra nga shërbimi ushtarak.

“Standardet duhet të jenë uniforme, neutrale ndaj gjinisë dhe të larta”, tha Hegseth. Fjalimi i tij u përqendrua në kulturën e ushtrisë amerikane, stërvitjen  dhe lidershipin.