Trupi i Navalny i dorëzohet nënës së tij

Trupi i figurës kryesore të opozitës ruse Alexei Navalny i është kthyer nënës së tij, tha zëdhënësja e tij.

Kjo vjen pasi asaj i ishte thënë të pranonte një varrim “të fshehtë”, përndryshe ai do të varrosej në koloninë e burgut ku vdiq, shkruan BBC.

Në një postim në X, zëdhënësja e Navalny, Kira Yarmysh falënderoi të gjithë ata që kishin kërkuar kthimin e trupit të tij.

“Funerali nuk është bërë ende”, ka shkruar ajo.

“Ne nuk e dimë nëse autoritetet do të ndërhyjnë që ajo të kryhet ashtu siç dëshiron familja dhe siç e meriton Alexei”.

Nëna e Navalny, Lyudmila, ka kaluar javën e fundit në qytetin afër burgut ku ai vdiq, duke u përpjekur fillimisht të konfirmonte vendndodhjen e trupit të tij dhe më pas duke kërkuar që t’i kthehej asaj.

Pasi nënshkroi një certifikatë vdekjeje që thoshte se ai kishte vdekur për shkaqe natyrore, asaj iu dhanë tre orë kohë për të rënë dakord për një funeral “të fshehtë” për djalin e saj.

Nëse ajo nuk do të ishte dakord, ai do të varrosej brenda ambienteve të burgut ku vdiq.

Sidoqoftë, Lyudmila me sa duket kishte refuzuar të negocionte me autoritetet.

Më herët, e veja e Navalny, Julia, akuzoi Vladimir Putinin se mbante “peng” trupin e burrit të saj të ndjerë dhe kërkoi lirimin e tij pa kushte.

Ajo akuzoi sërish presidentin rus se qëndron pas vdekjes së bashkëshortit të saj.

Kremlini i ka mohuar akuzat, duke e quajtur reagimin perëndimor ndaj vdekjes “histerike”.

Navalny vdiq më 16 shkurt në një burg rus brenda Rrethit Arktik.

Për vite ai ishte kritiku më i madh i liderit rus.

Në gusht 2020, ish-udhëheqësi i opozitës u helmua duke përdorur agjentin nervor Novichok nga një ekip vrasësish të mundshëm nga shërbimet sekrete ruse.

I transportuar me avion në Gjermani, ai u shërua atje përpara se të kthehej në Rusi në janar 2021, ku u burgos.

LEXONI GJITHASHTU:

• Vajza e kundërshtarit të Putin: Më shumë i trembet Navalny të vdekur se të gjallë
• Nënës së Navalnyt iu dha një ultimatum për të varrosur të birin në mënyrë sekrete