Tuneli SHBA-Rusi, Trump pyet Zelenskyn! Presidenti i Ukrainës: Nuk më pëlqen

Presidenti i Ukrainës, Volodymyr Zelensky, ka shprehur rezervat e tij ndaj një ideje të propozuar nga Moska për ndërtimin e një tuneli që do të lidhte Siberinë në Rusi me Alaskën në Shtetet e Bashkuara.

Deklarata e tij erdhi të premten në Uashington, gjatë një konference për shtyp përkrah Presidentit amerikan Donald Trump. I pyetur drejtpërdrejt nga Trump për qëndrimin ndaj projektit të mundshëm, Zelensky u përgjigj shkurtimisht:

“Nuk më pëlqen kjo gjë”, duke shkaktuar të qeshura mes presidentit amerikan dhe pjesëtarëve të delegacionit.

Zhvillimet vijnë pas një telefonate të fundit midis presidentit rus Vladimir Putin dhe homologut të tij amerikan, gjatë së cilës u diskutua ideja për një tunel nën Ngushticën e Beringut që do të lidhte Euroazinë me Amerikën e Veriut. Sipas mediave ruse, propozimi është përkrahur nga i dërguari i posaçëm Kirill Dmitriyev, i cili e cilësoi atë si “tuneli Putin-Trump”.

Në kuadër të kësaj nisme, Dmitriyev ka zhvilluar bisedime me një kompani shpimi në pronësi të miliarderit Elon Musk. Sipas tij, kostoja e projektit do të ishte më pak se 8 miliardë dollarë.

Megjithëse ideja për një lidhje hekurudhore përmes Ngushticës së Beringut është rishfaqur herë pas here gjatë më shumë se një shekulli, ajo nuk ka arritur të konkretizohet, për shkak të vështirësive teknike, mungesës së infrastrukturës dhe kostove të larta që lidhen me rajonet polare.

LEXONI GJITHASHTU:

• Trupat në gatishmëri pasi priten mbi 2500 protesta kundër Trump në mbarë vendin
• Amerikanët protestë ndaj politikave të Trump, tubimit i bashkohet Robert de Niro