“Turqia do të ndryshojë”- Osmani zbulon skenarin e ri pa Erdogan

Eksperti i marrëdhënieve ndërkombëtare, Kreshnik Osmani, është shprehur se në zgjedhjet e ardhshme në Turqi, mund të kemi një përballje mes kryebashkiakut të Stambollit nga radhët e opozitës dhe personit që do të dalë nga Partia e presidentit turk, Rexhep Tajip Erdogan.

Komentet Osmani i bëri në Euronews Albania, ku tha se skenografia e re politike për përfundimit të mandatit nga Erdogan, do të varet nga produktet e reja politike që po hyjnë në lojë.

Ai tha gjithashtu se fitorja e opozitës me një përqindje aq të lartë në Stamboll, ishte apokaliptike dhe e padëgjuar.

“Mendoj që në presidencialet e ardhshme, po të mos ketë figura të reja, do të kemi një përballje mes Ekrem Imamoglu, kryebashkiakut të Stambollit dhe personazhit që do të prodhojë AK-partia e Erdogan.

Kjo lloj përballje, bashkë me figurat e reja që po hyjnë në lojë, bashkë me dinamikat e partive të tjera, të gjitha këto do të na tregojnë se cili do të jetë produkti politik dhe skenografia politike që ka prodhuar shteti i ri turk. Me 10 pikë Stambolli, është një humbje e madhe apokaliptike. Ankaraja është gjysëm për gjysëm.

Mbërriti demagogjia në nivele që turqit i thanë stop këtu. Paraja të lodh, pushteti të lodh, demagogjia të lodh dhe vjen populli në një moment të caktuar dhe të jep një shuplakë e të thotë ose do zgjohësh, ose do ikësh”, tha Osmani.

LEXONI GJITHASHTU:

• A ka më pushtet Erdogan? Gazetari nga Turqia jep detaje
• Turqia mban zgjedhjet lokale, Erdogan synon të rimarrë Stambollin