Turqia e përçarë, gëzim në kampin e Erdogan, dëshpërim në atë opozitar

Ndërsa pluhuri elektoral i zgjedhjeve të së dielës u pastrua, qytetarët në Turqi po përballen me sundimin e presidentit Erdogan për 5 vite të tjera.

Ai fitoi me 52 për qind të votave, një mazhorancë e ngushtë ndaj rivalit reformator Kiliçdaroglu, por e mjaftueshme për ta nxjerrë si një lider të sprovuar.

“Shkoi siç e prisja, mendoj se fitoi personi që i bën mirë vendit tonë. Jam shumë i lumtur për shkak të prirjeve që ka ai, të tjerat s’kanë rëndësi. Vendi vjen i pari”- thotë një qyetar.

Shumë sondazhe paraelektorale sugjeronin se Erdogan do të humbiste dhe hapnin perspektivën për një epokë të re për Turqinë. Mbështetësit e opozitës e kanë të vështirë të pranojnë humbjen.

“Unë nuk kam më shpresë. Nuk kam shpresë për Turqinë. Dua të iki jashtë sa më parë. jam student inxhinierie dhe do të jem më mirë diku tjetër”- nënvizon qytetari.

Për të ribashkuar vendin, sikurse është zotuar, Erdoganit do t’i duhet të tejkalojë shumë sfida, përfshirë inflacionin e lartë dhe rindërtimin e zonave të shkatërruara nga tërmetet.

Ndërsa për aleancën opozitare, e cila iu afrua fitores, do të jetë një periudhë reflektimi për atë që duhet bërë për të bindur votuesit turq.

LEXONI GJITHASHTU: 

• Kosova “përqafon” inteligjencën artificiale, robotët ‘kërcënojnë’ punëtorët
• Ambasadori i SHBA-ve flet pas takimit me krerët e komunave në Veri, zbardhet biseda