Kosova “përqafon” inteligjencën artificiale, robotët ‘kërcënojnë’ punëtorët

Bizneset në Kosovë po shohin rrugë të reja përballë zhvillimeve teknologjike dhe mungesës së fuqisë punëtore. Robotët janë një alternativë e mirë dhe me rendiment në disa prej ndërmarrjeve.

Mungesa e fuqisë punëtorë sot është një shqetësim kombëtar në Kosovë dhe në rajon. Por, ndryshe nga shtetet fqinjë, bizneset në Kosovë mund të përballen më vështirësi në rritje në fillim të vitit 2024, kur do të hiqen vizat.

Por, për të përballuar këtë mangësi, disa prej sipërmarrjeve, kanë nisur të bëjnë atë që ka bërë Japonia dhe vende të tjera me popullsi të plakur. Të zëvendësojnë njerëzit me robotë.

Ky riorganizim, sigurisht që nuk zëvendëson të gjithë profilet e punonjësve, por ka dhënë rezultat në fabrikat dhe magazinat e prodhimit dhe përpunimit, ku roboti ka rendimentin e 4 njerëzve së bashku.

Në kompanitë e prodhimit të llaçit, menaxherët thonës, se me instalimin e robotit është shtuar shitja dhe është përshpejtuar prodhimi me 40%.

Por, drejtuesit e kompanive, megjithatë thonë se nuk ka vend për panik, në radhët e atyre punonjësve që nuk emigrojnë dhe i druhen largimit nga puna, pasi këto firma ristrukturohen.

Dhe ky riorganizim mund të jetë një lajm i mirë për ta, pasi me kthimin e shpejtë të investimit që jep roboti dhe rritjen e fitimit, krijohen hapësira për rritje të pagave.