Turqia ndalon anijen ruse që po transportonte grurë ukrainas

Autoritetet doganore në Turqi kanë ndaluar një anije ruse mallrash që transportonte drithë për të cilën Ukraina thotë se është e vjedhur.

Lajmi u bë i ditur nga ambasadori i Ukrainës në Turqi, Vasyl Bodnar, shkruan Reuters.

“Ne kemi bashkëpunim të plotë. Anija ndodhet aktualisht në hyrje të portit, ajo është ndaluar nga autoritetet doganore të Turqisë”, u shpreh ai.

Bodnar tha se fati i anijes do të vendosej nga një takim i hetuesve të hënën dhe se Ukraina shpresonte për konfiskimin e grurit.

Ukraina i kishte kërkuar më parë Turqisë të ndalonte anijen e ngarkesave me flamur rus, Zhibek Zholy.

Ukraina ka akuzuar Rusinë për vjedhjen e grurit nga territoret që forcat ruse kanë nën kontroll që nga fillimi i pushtimit të Moskës në fund të shkurtit.

Por pretendimet e tyre janë hedhur poshtë nga Kremlini.

LEXONI GJITHASHTU

• Scholz: Ukrainës mund t’i garantojmë siguri, por jo si vend anëtar i NATO-s
• Rusia pretendon se forcat e saj kanë nën kontroll rajonin e Ukrainës Lindore