Turqia ndalon përkohësisht avionët C-130 pas aksidentit me 20 ushtarë të vrarë

Turqia ka pezulluar përkohësisht fluturimet e të gjithë aeroplanëve të saj ushtarakë të mallrave C-130 si masë paraprake, tha të enjten ministria e mbrojtjes, pas rrëzimit të avionit në Gjeorgji që mori jetën e 20 personave, të cilët ishin personel ushtarak.

Aeroplani i mallrave po fluturonte nga Azerbajxhani për në Turqi kur u rrëzua në komunën Sighnaghi të Gjeorgjisë, pranë kufirit me Azerbajxhanin, të martën, ndërkohë shkaku i rrëzimit është ende duke u hetuar.

Personeli ushtarak ishte pjesë e një njësie përgjegjëse për mirëmbajtjen dhe riparimin e avionëve turq F-16 që kishin fluturuar në Azerbajxhan për të marrë pjesë në festimet e Ditës së Fitores në vend.

Ministria e Mbrojtjes Kombëtare tha se fluturimet e C-130 u pezulluan përkohësisht për t’i lejuar avionit t’i nënshtrohet inspektimeve të hollësishme teknike. Vetëm ata që kalojnë me sukses kontrollet do të lejohen të rifillojnë fluturimet, tha ministria në një deklaratë.

Aeroplanët ushtarakë të mallrave C-130 Hercules të prodhuar në SHBA përdoren gjerësisht nga forcat e armatosura të Turqisë për transportimin e personelit dhe trajtimin e operacioneve logjistike.

Avioni i cili u rrëzua, u ble nga Arabia Saudite në vitin 2012 dhe iu shtua inventarit të Forcave Ajrore të Turqisë në vitin 2014 pas mirëmbajtjes. Më vonë iu nënshtrua modernizimit dhe kishte qenë në përdorim që nga viti 2022. Mirëmbajtja e saj më e fundit e planifikuar u përfundua më 12 tetor, tha ministria.

LEXONI GJITHASHTU:

• Turqia kërkon më shumë se 2000 vjet burg për kryebashkiakun e Stambollit
• VIDEO/ Rrëzohet avioni ushtarak turk, vdesin 20 anëtarë të ekuipazhit