Djegia gjatë gjithë këtyre ditëve në zonën torfike në fushën e Maliqit është kthyer në shqetësim për banorët e fshatrave që banojnë përreth kësaj fushe.

Sipas tyre më e rëndë situata paraqitet në orët e para të mëngjesit por dhe të mbrëmjes aq sa e kanë tejet të vështirë të hapin dritaret për shkak të tymit të çliruar.

Ata thonë se gazrat që çlirohen nga djegia e tokës së kësaj zone në një sipërfaqe të madhe ka shkaktuar  vështirësi në frymëmarrje për të moshuarit e fëmijët në veçanti.

Për këtë kërkojnë ndërhyrje e autoriteteve lokale për izolimin e djegies së kësaj zone të kthyer në shqetësim, në veçanti për banorët e Sheqerasit, Sovjanit, Vreshtas e Pirgut.

Burime pranë shërbimit zjarrfikës të bashkisë Maliq thonë se një pjesë e mirë e zonës torfike ka djegie natyrale por një pjesë tjetër ka ardhur edhe për shkak të djegieve të kashtave pas korrjeve të kulturave bujqësore.

Nga ana e këtij shërbimi kanë qenë të angazhuara forca të këtij shërbimi, mjete zjarrfikëse madje edhe mjete bujqësore me qëllim ndërprerjen e djegies por është e pamundur për shkak të temperaturave të larta dhe erërave që ndihmojnë përhapjen e flakëve.

LEXONI GJITHASHTU:

• Zjarret në Dropull, reshjet e shiut ndihmojnë në lehtësimin e situatës
• Ndezi zjarr në pyllin e fshatit Çërrilë në Mallakastër, procedohet 34-vjeçari