Ish-kryebashkiaku i Vorës Agim Kajmaku i arrestuar dy ditë më parë në Itali pasi u kap me 20 kilogramë kokainë, ka ende një çështje të hapur me drejtësinë shqiptare.

Në muajin shkurt të 2022 Prokuroria ka ankimuar në Gjykatën e Apelit vendimin e Gjykatës së Tiranës që pushoi çështjen ndaj Kajmakut për akuzat e ‘falsifikim i vulave, stampave ose i formularëve’.

Në vendimin e dhjetorit 2021, gjyqtarja Shefkie Demiraj konkludoi se provat e paraqitura nga prokuroria nuk ishin të mjaftueshme për të vërtetuar akuzën për falsifikim të vulave stampave ose i formularëve.

“Gjatë shqyrtimit të çështjes objekt gjykimi rezultoi plotësisht e provuar se i pandehuri A. K. i ka nxjerrë urdhrat për lirimin nga detyra të dy nënkryetarëve të bashkisë dhe drejtorit të kabinetit dhe urdhrin për emërimin e këtij të fundit në detyrën e nënkryetarit, gjatë kohës që ka qenë në detyrë dhe ende nuk ishte shkarkuar nga KQZ-ja”, thuhet në argumentimin e Gjykatës së Tiranës.

Prokuroria kishte kërkuar në nëntor 2019 arrestimin e Agim Kajmakut, ish-kryetar i bashkisë Vorë, me akuzat e falsifikim të formularit të dekriminalizimit dhe shpërdorim detyrë.

Sipas Prokurorisë, mbi Kajmaku rëndonte edhe akuza e ushtrimit të funksioneve publike pas mbarimit të mandatit, pasi kishte shkarkuar dy nënkryetarët e bashkisë në një kohë që ishte shkarkuar nga KQZ.

LEXONI GJITHASHTU:

• Pse po hetohet në Shqipëri për Agim Kajmakun? Gazetari sqaron dyshimet
• Arrestohet ish-kryetari i bashkisë Vorë Agim Kajmaku