U kapën duke transportuar emigrantë ilegalë, 2 të arrestuar, në pranga edhe një shtetas i huaj

Policia e Tiranës ka arrestuar 2 shtetas që u kapën duke transportuar emigrantë që synonin të kalonin ilegalisht në shtetet e BE-së, kundrejt pagesës.

Në pranga u vu edhe një shtetas i huaj, i cili merrej me organizimin dhe grumbullimin e emigrantëve.

“Në vijim të goditjeve të njëpasnjëshme të veprimtarisë kriminale në fushën e kontrabandimit të emigrantëve nga vendet e treta drejt vendeve të BE-së, specialistët e Seksionit për Trafiqet e Paligjshme në bashkëpunim me Forcën Operacionale në DVP Tiranë goditën një tjetër rast, duke vënë në pranga shtetasit: Hysni Stërmungu, 28 vjeç; Helidon Dhima, 43 vjeç dhe Hassan Mobin, 28 vjeç.

Shtetasit Hysni Stërmungu, dhe Helidon Dhima janë kapur në flagrancë nga shërbimet e Policisë, te rrethrrotullimi i Rinasit, duke transportuar me një automjet 5 emigrantë, të cilëve, kundrejt pagesës 2500 euro secilit, iu kishin premtuar transportimin me destinacion final shtetin italian.

Ndërkaq, nga hetimi dyshohet se shtetasi Hassan Mobin merrej me organizimin dhe grumbullimin e emigrantëve”, tha policia.

Materialet procedurale iu referuan Prokurorisë së Tiranës, për veprime të mëtejshme.