U rrah keq në burg në 2016, vdes shqiptari i dënuar për vrasje të dyfishtë në Itali

Shqiptari që tronditi Italinë me vrasjen e dyfishtë në zonën Komo në vitin 2014, Dritan Demiraj, ndërroi jetë të enjten e kaluar në spitalin e Parmës, ku qëndronte prej shumë kohësh në koma.

Sipas mediave të huaja, Demiraj u dënua me burgim të përjetshëm për vrasjen e ish-të dashurës rumune, Lidia Nusdorfi dhe të të dashurit të saj, Silvio Mannina.

Më pas në qeli, gjatë vitit 2016, Demiraj u masakrua në korridoret e burgut nga një rumun ish-boksier, me grushta dhe shkelma. Që prej atij momenti, Demiraj nuk mbante mend më asgjë, as të afërmit e tij dhe as vrasjet e kryera dhe truri i tij ishte shndërruar në atë të një fëmije, që ka nevojë për përkujdesje të vazhdueshme.

Ish-të dashurën rumune, Demiraj e vrau duke e qëlluar me thikë 11 herë në stacionin Mozzate në Komo, ndërsa të dashurin e saj, e joshi me anë të një kurthi në Rimini së bashku me partneren e tij Monica Sanchi, e cila mori pjesë në krim.

Shqiptari bashkë me të dashurën masakruan, Silvio Manninën duke e hedhur më pas trupin e tij në kënetën Laggo Azzurro të Santarcangelo. Prandaj dhe rrahja barbare e Demirajt në korrideret e burgut u pa si shenjë hakmarrje prej boksierit rumun.

Më pas, prej kushteve klinike të pakthyeshme, Gjykata e Apelit të Bolonjës, vendosi duke zbatuar edhe reformën e Orlandos se nuk kishte më vend që ai të vijonte burgimin, pasi ishte shpallur i paaftë për të kuptuar. Ish-e dashura, Monica Sanchi që bashkëpunoi në krim u dënua me 30 vite.

Edhe ajo u përball me një fat të keq, pasi në vitin 2019 ndërroi jetë për shkak të një tumori, që e mbajti në shtrat në gjendje paralize për një kohë të gjatë.

“Unë nuk jam një përbindësh, mos më gjykoni shumë ashpër”, ishte përgjëruar ajo para se të vdiste. Ajo u zotua se nëse do të kthehej pas në kohë, do ta ndalonte Dritanin të vriste dy persona.

“Mallkimi im ishte të kaloja rrugën e tij. Ta kisha dashur atë,” tha ajo.

Ndërkohë Sadik Dine, daja i Dritanit, vuan dënimin si bashkëpunëtor, me burgim të përjetshëm në burgun e Ferrarës, i cili u bë përfundimtar në Gjykatën e Lartë pasi Gjykata e Apelit rrëzoi dënimin pesëvjeçar të Shkallës së Parë për fshehjen e kufomës.

Ish-peshkatari Dine ka mohuar të ketë ndihmuar nipin në vrasjet e tij, por sipas dëshmisë së Sanchit, ai kishte ndihmuar në zhdukjen e trupit të Manninas në kënetë dhe ka marrë pjesë aktive në krim.

Me 28 vjet është dënuar një tjetër bashkëpunëtor i Demirajt për këto ngjarje kriminale. Bëhet fjalë për një ish-mikun e tij, i cili ka qenë i mitur në kohën kur këto ngjarje ndodhën. Por ai deklaroi se ishte i pafajshëm dhe ka vijuar të mbajë këtë qëndrim.