Udhëheqësi suprem i Iranit, Ayatollah Ali Khamenei, mbajti këtë të mërkurë një fjalim në një takim me elitat akademike në Iran.
Në fjalën e tij Khamenei u ndal dhe te situata në Lindjen e Mesme një ditë pasi Irani goditi me një sulm masiv raketor Izraelin.
Ai fajësoi për tensionet dhe luftërat në rajon SHBA-të dhe disa vende evropiane.
Khamenei tha se Perëndimi duhet të largohet nga rajoni në mënyrë që aty të ketë paqe.
Sakaq, një zyrtar i lartë iranian tha për agjencinë e lajmeve Reuters se urdhri për të sulmuar me raketa Izraelin të martën, u dha nga vetë udhëheqësi suprem i vendit, Ali Khamenei.
Më 1 tetor, Irani realizoi një sulm masiv raketor ndaj Izraelit, duke lëshuar rreth 180 raketa drejt territorit izraelit. Ky incident përbën sulmin e dytë të madh nga Irani këtë vit, pas një sulmi të ngjashëm në prill, kur u lëshuan rreth 110 raketa balistike dhe 30 raketa lundrimi drejt Izraelit. Pamjet e transmetuara nga mediat izraelite treguan disa raketa që fluturonin mbi zonën e Tel Avivit, ndërsa shumica e tyre u rrëzuan nga sistemet e mbrojtjes ajrore të Izraelit, si “Iron Dome” dhe “David’s Sling”. Megjithatë, disa raketa arritën të godisnin baza ushtarake dhe zona civile, duke shkaktuar panik mes popullsisë.
Kryeministri izraelit, Benjamin Netanyahu, paralajmëroi për “pasoja të rënda” si rezultat i këtij sulmi, duke thënë se Irani kishte bërë një “gabim të madh”. Ky sulm erdhi si përgjigje ndaj vrasjeve të disa liderëve të lartë të mbështetur nga Irani, përfshirë komandantin e Gardës Revolucionare Islamike, Abbas Nilforoshan, dhe liderin e Hezbollahut, Hassan Nasrallah, si dhe liderin politik të Hamasit, Ismail Haniyeh.
LEXONI GJITHASHTU:
- Netanyahu: Irani bëri gabim të madh dhe do të paguajë
- Irani sulmoi me raketa, mediat amerikane: Izraeli do të nisë një hakmarrje të madhe
