Ukraina fton për vizitë ministrin e jashtëm të Kinës

Një takim i mundshëm mes udhëheqësve kinezë dhe ukrainas u vendos në qendër të vëmendjes ndërsa Ukraina ftoi të martën ministrin e jashtëm të Kinës për bisedime dypalëshe.

Ftesa vjen pasi ministri i Jashtëm ukrainas Dmytro Kuleba shkoi në Kinë javën e kaluar, vizita e parë e këtij lloji që kur filloi sulmi frontal i Rusisë në Ukrainë në shkurt 2022.

“Jemi të gatshëm të mirëpresim Ministrin Wang Yi në Ukrainë që të shohë me sytë e tij pasojat e agresionit rus ndaj vendit tonë dhe që të mbajmë bisedime më të thella dypalëshe me të për një numër çështjesh dypalëshe, rajonale dhe ndërkombëtare”, tha zëdhënësi i ministrisë së Jashtme ukrainase, Heorhii Tykhyi, gjatë një informimi për shtypin të martën në Kiev.

Kina ka shprehur interesimin për një vizitë të tillë, thanë autoritetet ukrainase.

Kina ka paraqitur një qëndrim neutral në luftën mes Rusisë dhe Ukrainës, ndërsa ruan marrëdhëniet me Rusinë dhe e ndihmon atë ekonomikisht.

Sipas Zëri i Amerikës, Ftesa nga Ukraina vjen ndërsa Rusia njoftoi se mori edhe një tjetër fshat ukrainas të martën. Rusia e përshkroi këtë fshat si “të çliruar”, një ndër disa fshatrat e marra nga forcat ruse gjatë javëve të fundit.

Rusia filloi gjithashtu të martën manovra ushtarake me shtrirje të gjerë, me mbi 300 operacione stërvitore që pritet të mbahen. Në këto manovra janë planifikuar të marrin pjesë 20 mijë ushtarë, 300 anije dhe 50 avionë.

LEXONI GJITHASHTU:

• Ukraina: Kemi zmbrapsur sulme ruse në katër rajone
• Ukraina thotë se është e rrethuar nga 500 mijë trupa ruse