Ukraina lëshon raketa me rreze të gjatë të prodhuara nga SHBA drejt Rusisë

Ukraina ka lëshuar raketa ATACMS të prodhuara nga SHBA në rajonin Bryansk të Rusisë, tha Ministria e Mbrojtjes e Rusisë, pasi administrata e Biden i dha Kievit dritën jeshile për të përdorur armët me rreze më të gjatë kundër objektivave brenda Rusisë.

Në orën 3:25 të mëngjesit me orën lokale, Ukraina gjuajti gjashtë raketa balistike në një objekt në Bryansk, tha ministria, shkruan CNN.

“Sipas informacioneve të konfirmuara, ATAMCS i prodhimit amerikan. U përdorën raketa operative-taktike”, thuhet në njoftim.

Mbrojtja ajrore ruse rrëzoi pesë nga raketat dhe një tjetër u dëmtua. Fragmente nga raketa e dëmtuar kanë rënë në territorin e një objekti ushtarak, duke shkaktuar një zjarr që më pas është shuar. Nuk ka pasur viktima apo dëme.

Sulmi do të shënonte herën e parë që Ukraina ka përdorur armët amerikane me rreze më të gjatë për të goditur objektiva thellë brenda Rusisë. Kyiv nuk i është përgjigjur menjëherë raportit.

Të dielën, presidenti amerikan Joe Biden autorizoi Ukrainën të përdorë raketa amerikane me rreze më të gjatë veprimi brenda Rusisë, duke i dhënë fund një ndalimi prej muajsh që synonte të ndihmonte Ukrainën të mbrohet duke mos përshkallëzuar në mënyrë drastike konfliktin.

Vendimi erdhi në një moment vendimtar në pushtimin rus të Ukrainës, tashmë prej 1000 ditësh. Ndërkohë, mijëra trupa të Koresë së Veriut janë dislokuar në rajonin Kursk të Rusisë, ku trupat ukrainase nisën një kundërofensivë të guximshme gjatë verës.

LEXONI GJITHASHTU:

• Çfarë është ATACMS: Sistemi raketor që do të përdorin ukrainasit në territorin rus
• Scholz bisedë telefonike me Putin, i kërkon të tërheqë trupat nga Ukraina