Ukraina ‘përçan’ Evropën

Bashkimi Evropian ka qenë i qartë dhe i unifikuar mbi mbrojtjen e integritetit territorial të Ukrainës. Por debati në Parlamentin Evropian të mërkurën pritet të tregojë se palët ndahen tek detajet.

Për grupin socialist, dialogu është mënyra e vetme për ç’tensionimin e krizës ukrainase.

 “Duhet të kuptojmë se kjo çështje ka aspekte të ndryshme që kanë të bëjnë me territorin, vendin, situatën dhe se si sanksionet ekonomike do të prekin sektorë të caktuar. Por në çdo rast është e qartë se nëse do të ketë një ndërhyrje ushtarake nga Rusia do të jetë e nevojshme implementimi i sanksioneve dhe në këtë aspekt, Parlamenti bie dakord,” – deklaroi Iraxte Garcia, lidere e grupit socialist në Spanjë.

Zërat më kritikë vijnë nga e djathta ekstreme, por edhe nga e majta, që duan që BE të jetë neutrale.

“Nga njëra anë, Putin po bën disa provokime me dërgimin e trupave në kufi. Në anën tjetër, NATO dhe SHBA po bëjnë provokime kur deklarojnë se duan ta zgjerojnë Aleancën në kufijtë rusë. Dhe qëndrimi ynë, duke qenë se jam franceze dhe ndjek traditat e gjeneralit De Gaulle, nuk përkon. Ne nuk duhet të zgjedhim as anën e Rusisë dhe as atë të NATO-s,” – u shpreh Manon Aubry, lidere e së majtës në Francë.

Por ka dhe nga ata që thonë se BE jo vetëm që duhet të zgjedhë një anë, por të tregohet edhe më e qartë ndaj Rusisë.

 “Duhet t’i themi Putin se nëse pushton Ukrainën do të ketë një luftë guerrile që ne do ta mbështesim për 10 vjet, nëse nevojitet. Më pas, ne do të marrim paratë personale të tij, të fshehura nga oligarkët në parajsat fiskale dhe bankat perëndimore,” – tha Radoslaë Sikorski, euro-deputet i PPE-së.

Ndërkohë, Parlamenti Evropian ka aprovuar një paketë të re ndihme prej 1.2 miliard eurosh për Ukrainën, pasi frika nga pushtimi rus po dëmton ekonominë e saj.

LEXONI GJITHASHTU:

• Gjermania i kërkon Rusisë të shtensionojë situatën me Ukrainën