‘Ukraina po reziston’, Zelensky në SHBA, konfirmohen marrëdhëniet Kiev-Uashington

Presidenti ukrainas, Volodymyr Zelensky ka mbajtur një fjalim historik në Kongresin amerikan, në kuadër të vizitës që synonte të përgënjeshtronte përpjekjet e Rusisë për të treguar se marrëdhëniet Kiev-Uashington po ftoheshin.

Zelensky e përdori mundësinë e tij për të sqaruar atë që e quajti situata reale në Ukrainë.

“Vitin e kaluar në Bakhmut jetonin 70 mijë banorë. Në këtë qytet tani kanë mbetur fare pak civilë. Çdo milimetër i kësaj toke është lagur nga gjaku, zhurmat e armëve dëgjohen në çdo orë. Në Donbas llogoret ndryshojnë disa herë në ditë si pasojë e luftimeve, por ukrainasit u bëjnë ballë”, theksoi ai.

Nëse ndonjë republikan nuk ishte aq entuziast për atë që e quajnë qasjen e “çekut të bardhë” të demokratëve në luftën kundër Rusisë, në këtë rast nuk e tregoi.

Më herët, presidenti Joe Biden priti Zelenskyn në Shtëpinë e Bardhë, ku lideri ukrainas shprehu mirënjohjen për mbështetjen e Uashingtonit dhe të popullit amerikan. Ai u shpërblye me miliarda dollarë në asistencë ushtarake dhe u zotua se Ukraina do të ndjekë rrugën e paqes.

Pjesë e paketës së fundit amerikane është edhe sistemi raketor “Patriot”, armatimi më i avancuar tokë-ajër që Perëndimi i ka ofruar Ukrainës.

Më herët, Rusia ka paralajmëruar se kjo do të çojë në një përshkallëzim të tensioneve dhe do të ndikonte negativisht për Ukrainën.

LEXONI GJITHASHTU

• Zelensky: Paqja me Rusinë nuk do të thotë kompromis për sovranitetin e Ukrainës
• Zelensky: Ndihma e SHBA-së për Ukrainën është vendimtare
• Zelensky mbërrin në SHBA, një avion ushtarak amerikan e shoqëroi për arsye sigurie