Ukraina rrëzon një dron të sajin në Kiev

Forca ajrore e Ukrainës tha se ka rrëzuar një dron të sajin, i cili kishte humbur kontrollin mbi qendër të Kievit.

Për rreth 15-20 minuta, mbrëmjen e së enjtes, kishte shpërthime, derisa mbrojtja ajrore bënte përpjekje ta rrëzonte atë në një zonë pranë Zyrës së Presidentit.

Shefi i shtabit presidencial të Ukrainës, Andriy Yermak, tha fillimisht se droni i rrëzuar, “ishte i armikut”, duke iu referuar ushtrisë pushtuese ruse.

Por, forca ajrore pranoi më vonë se droni ishte ukrainas dhe se ishte shkatërruar për t’i shmangur “rrethanat e padëshirueshme”.

Sipas saj, rrëzimi i dronit nuk shkaktoi viktima apo të plagosur.

Incidenti ndodhi pasi Rusia akuzoi Ukrainën për kryerjen e një sulmi të supozuar me dron, të mërkurën, në Kremlin.

Sipas Moskës, sulmi kishte për qëllim vrasjen e presidentit rus, Vladimir Putin, i cili nuk ishte në ndërtesë në atë kohë.

Kievi i hodhi poshtë akuzat, duke thënë se nuk ka lidhje me sulmin e supozuar.

LEXONI GJITHASHTU:

• Përdorimi i rregullt i internetit nga të moshuarit, ul me 50% rrezikun e demencës
• Bie vlera e zyrave, puna nga shtëpia zhvlerëson qendrat tregtare, 80% më lirë