Dëbimi i diplomatëve nga Shqipëria, reagon Irani

Irani ka reaguar pas vendimit të qeverisë shqiptare për të dëbuar diplomatët e këtij shteti nga vendi ynë pas sulmit kibernetik pak kohë më parë.

Në një deklaratë pasditen e së mërkurës, zëdhënësi i Ministrisë së Jashtme iraniane, Nasser Ka’nani hodhi poshtë pretendimet e pabaza të qeverisë së Shqipërisë kundër Republikës Islamike të Iranit.

Ai tha se Ministria e Jashtme iraniane e konsideron vendimin e Shqipërisë për të ndërprerë marrëdhëniet politike me Iranin bazuar në pretendime të tilla të pabaza, një veprim i pamenduar në marrëdhëniet ndërkombëtare, shkruajnë mediat në Iran.

“Si një nga vendet që ka qenë objekt i sulmeve kibernetike në infrastrukturën e saj kritike, Republika Islamike e Iranit kundërshton dhe dënon çdo përdorim të hapësirës kibernetike si mjet për të sulmuar infrastrukturën e vendeve të tjera”, tha zëdhënësi iranian.

Ai tha se palët e treta që mbështesin terrorizmin kanë ndikuar në vendimin e gabuar të Shqipërisë.

Reagimi i menjëhershëm i Izraelit dhe SHBA dëshmojnë për një fushatë të re kundër Iranit, theksohet në reagim.

Në deklaratë shprehet keqardhja që Tirana zyrtare u influencua në vendimet e saj të papërshtatshme nga palë të treta.

LEXONI GJITHASHTU:

• Rama ultimatum diplomatëve iranianë: Largohuni brenda 24 orëve
• Cilat janë shtetet më të urryera nga Irani?