Universiteti i Oksfordit zgjedh fjalën e vitit, termi trend i përdorur në Tik Tok

Jeni të aftë të bisedoni lirshëm apo të flirtoni me partnerë potencialë? Nëse po, atëherë ju keni të ashtuquajturën “rizz”, edhe në rast se nuk e dini.

Bëhet fjalë për fjalën e vitit të Universitetit të Oksfordit, që është një zhargon interneti për të qenurit romantik apo tërheqës e që përdoret kryesisht nga të rinjtë.

“Rizz” ishte një nga 8 fjalët e mbledhura në një listë të vetme, të zgjedhura për të reflektuar humorin, moralin apo shqetësimet për vitin 2023.

Lista u ngushtua përmes një vote publike, përpara se leksikografët e Oksfordit të merrnin vendimin përfundimtar.

Fjala mund të mos thotë asgjë për ata që nuk i përkasin të ashtuquajturës “Gjenerata Z”. Por ajo përdoret masivisht online, me miliarda përdorues të hashtagut “rizz” në rrjetin social “TikTok”.

Sipas zyrës së Universitetit të Oksfordit që merret me publikimin e fjalorit të gjuhës angleze, përmes “rizz” përkufizohet stili, joshja, tërheqja, apo aftësia për të bërë për vete një partner seksual.

Termi mendohet të jetë një variant i shkurtuar i fjalës “karizma”. Në gjuhën angleze ai mund të përdoret edhe si folje si për shembull për të joshur apo për të sjellë në qejf dikë.

LEXONI GJITHASHTU:

• 115-vjetori i Ditës së Alfabetit, Begaj: Gjuha shqipe të pasurohet
• Fjalori i gjuhës shqipe do të pasurohet me 70 mijë fjalë të reja