Ura në Ibër, Bislimi: Nuk është vendim i njëanshëm, por marrëveshje mes dy palëve

Zëvendëskryeministri i Kosovës, Besnik Bislimi ka reaguar përmes një postimi në faqen e tij në Facebook ku shprehet se hapja e urës së Ibrit në Mitrovicë nuk është vendim i njëanshëm i Qeverisë së Kosovës.

Sipas Bislimit, kjo cështje nuk është mbajtur pezull, por është kërkesa kryesore e marrëveshjes mes Kosovës dhe Serbisë e të ndërmjetësuar nga BE-ja në vitet 2015 dhe 2016.

“Plani implementues i BE-së i datës 5 gusht 2016, e konsideron hapjen e urës si “Simbol i normalizimit të marrëdhënieve ndërmjet serbëve të Kosovës, shqiptarëve dhe komuniteteve të tjera”.Raporti për Vendin i vitit 2020 nga ana e Komisionit Evropian për Kosovën, nxjerr konkluzionin si në vijim: ‘Punimet në urën e Mitrovicës kanë përfunduar dhe ura duhet të hapet për qarkullimin e automjeteve pa vonesa apo pengesa të mëtejshme’.” –shkruan Bislimi.

Zëvendëskryeministri u shpreh se kanë ndjekur dy rekomandime, një nga Lajçak, i cili ka deklaruar që të bëhen diskutime të brendshme , nëse nuk diskutoheyt çështja në Bruksel.

Ndërsa rekomandimi i dytë, nga një partner i QUINT-it, lidhej me kryerjen e inspektimeve teknike.

“Ne i kemi ndjekur të dyja këto rekomandime. Tani BE-ja po kërcënon Kosovën, në rast se ajo zbaton vetë marrëveshjen e ndërmjetësuar nga BE dhe rekomandimet shtesë. Qeveria e Republikës së Kosovës beson fuqishëm se BE-ja promovon më shumë liri të lëvizjes dhe më pak kufij apo mure ndërmjet etnive.” –përfundoi ai.