Urdhëri i Trump, ndalohet pjesëmarrja e atleteve transgjinore në garat e notit

Asnjë atlete transgjinore nuk lejohet të garojë në kategorinë e femrave në Shtetet e Bashkuara. Komiteti Olimpik dhe Paralimpik i SHBA-së (USOPC) e ka konfirmuar këtë, duke njoftuar federatat e notit, atletikës dhe sporteve të tjera se ato kanë një “detyrim për t’u pajtuar” me urdhrin ekzekutiv të lëshuar nga Presidenti Donald Trump.

Politika e re, e njoftuar të hënën përmes një përditësimi në faqen zyrtare të USOPC-së dhe e konfirmuar në një letër drejtuar organeve kombëtare drejtuese të sportit, vjen pas një mase të ngjashme të miratuar nga NCAA në fillim të këtij viti, e cila preku, ndër të tjera, notaren Lia Thomas, atleten e parë transgjinore që fitoi një kampionat të Divizionit I të NCAA.

Ndryshimi i USOPC-së përmendet në mënyrë indirekte në seksionin “Politika e Sigurisë së Atletëve të USOPC” dhe i referohet urdhrit ekzekutiv të Trump, të titulluar “Mbajtja e Burrave Larg Sporteve të Grave”, të nënshkruar në shkurt.

Ky urdhër, ndër të tjera, kërcënon të “tërheqë të gjitha fondet” nga organizatat që lejojnë atletët transgjinorë të marrin pjesë në sportet e femrave. Zyrtarët olimpikë të SHBA-së i kanë komunikuar organeve qeverisëse kombëtare se do të duhet të ndjekin të njëjtën linjë, duke shtuar se “USOPC është angazhuar në një sërë bisedash respektuese dhe konstruktive me zyrtarët federalë” që prej se Trump mori detyrën.

“Si një organizatë e miratuar federalisht, ne kemi detyrimin të përmbushim pritjet federale,” shkruhet në një letër nga CEO-ja e USOPC-së, Sarah Hirshland, dhe presidenti Gene Sykes.

“Politika jonë e rishikuar thekson rëndësinë e sigurimit të mjediseve të drejta dhe të sigurta të konkurrencës për gratë. Të gjitha organet qeverisëse kombëtare duhet të përditësojnë politikat e tyre përkatëse në përputhje me dispozitat e reja.”

Qendra Kombëtare Ligjore për Gratë lëshoi menjëherë një deklaratë ku dënon vendimin, përmes presidentes dhe drejtoreshës ekzekutive të organizatës, Fatima Goss Graves: “Duke iu nënshtruar kërkesave politike, USOPC po sakrifikon nevojat dhe sigurinë e atletëve të saj.”