Ushtria e Kosovës në misione paqeruajtëse, Meta: Duhet të jetë sa më parë anëtare e NATO-s

Presidenti Ilir Meta ka përshëndetur vendimin e parlamentit të Kosovës për të autorizuar Forcën e Sigurisë së Kosovës që të marrë pjesë në misionet paqeruajtëse në botë

Kreu i shtetit thekson se Kosova e meriton plotësisht që të jetë sa më parë anëtare e NATO-s.

“Përshëndes vendimin historik të Parlamentit të Kosovës për të autorizuar Forcën e Sigurisë së Kosovës të marrë pjesë në misionet paqeruajtëse në botë, në bashkëpunim me ushtrinë amerikane. Kosova dëshmon qartë çdo ditë se është jo vetëm një faktor i rëndësishëm për paqen, stabilitetin e sigurinë në rajon, por edhe promovuese e këtyre vlerave në botë. Kosova e meriton plotësisht të jetë sa më parë anëtare e NATO-s dhe do të ketë mbështetjen e pakursyer të Shqipërisë në këtë drejtim”, shkruan Meta në një postim në Facebook.

Ushtria e Kosovës do të renditet përkrah ushtrisë amerikane në misione paqeruajtëse.

Ndërkohë, mëngjesin e sotëm ministri i Mbrojtjes i Kosovës, Anton Quni tha për Euronews Albania se kjo është një ngjarje historike për kombin dhe shtetit e Kosovës.

Lexoni gjithashtu:

FSK në misione paqeruajtëse, ministri i Mbrojtjes: Po përmbushim të gjitha parakushtet për të qenë në NATO

Ushtria e Kosovës përkrah SHBA në misione paqeruajtëse, Hoti: Gur themeli në rrugën e integrimit euro-atlantik